Një lojtar i skuadrës së Real Madridit rrezikon burgun, pasi nuk respektoi rregullat për vetëkarantinim, në kuadër të masave të marra për frenimin e koronavirusit.
Bëhet fjalë për futbollistin Luka Jovic, i cili udhëtoi drejt Serbisë për të festuar ditëlindjen e të dashurës së tij, Sofia Milosevic.
Ky lajm është konfirmuar për mediat edhe nga babai i futbollistit 22-vjeçar.
“Tani Luka duket sikur është një kriminel, nëse duhet të shkojë në burg duhet ta bëjë. Jam plotësisht dakord me presidentin dhe kryeministrin por vetëm nëse djali im ka faj. Luka ka ardhur në Serbi dhe nuk ka takuar askënd, por ka hyrë menjëherë në apartamentin e tij. E dashura e tij Sofia është shtatzënë dhe nuk mund të lëvizë nga shtëpia. Fotot që kanë dalë në mediat spanjolle janë foto të vjetra. Luka erdhi në Serbi për të qëndruar pranë familjes së tij. Ai ka kryer dy teste ndaj koronavirusit dhe të dy kanë rezultuar negativë. Luka e kishte programuar këtë udhëtim dhe nuk ka ardhur për ditëlindjen e Sofias për të festuar siç është thënë në media”, deklaroi babai i tij.
