E dini se ekziston një aplikacion që kontrollon lëvizjet e grave? Ndonëse ky aplikacion i tillë konsiderohet si abuzim ndaj të drejtave të grave, dhe sipas kritikëve, vendet perëndimore duhet të jenë të parat që t’i dënojnë platforma të tilla, në Arabinë Saudite po japin shenjat për të thelluar edhe më tej pabarazinë gjinore.
Më konkretisht, bëhet fjalë për aplikacionin Absher që shkarkohet në smartphone, i cili lejon qytetarët dhe rezidentët e Arabisë Saudite të përdorin një sërë shërbimesh zyrtare. Ky opsion përmban rreth 160 shërbime, ku përfshihen rinovimi i pasaportës, i kartave të identitetit dhe ndër të tjera, i jep mundësinë burrave arab të gjurmojnë vendodhjen e grave kur udhëtojnë dhe jo vetëm.
Kompanitë gjigante si Apple dhe Google janë akuzuar si mbështetësit kryesorë, që thellojnë diskriminimet gjinore në Arabinë Saudite, duke i ndihmuar burrat të kontrollojnë gratë, apo t’i ndalojnë ato të lënë vendin.
Si Google Play ashtu edhe iTunes e kanë pjesë të tyren Absher, një aplikacion që mes të tjerave u jep akses burrave të dinë në kohë reale kur një grua kalon kufijtë e vendit. Në telefonin e tyre vjen një sms informuese.
Përpos informacionit të detajuar, ata vendosin numrin e udhëtimeve që një grua mund të bëjë, apo sa larg i lejohet asaj të shkojë. Nëse një burrë nuk është dakord me udhëtimin, ka të drejtë ta anulojë fluturimin e saj.
