Katër persona kanë humbur jetën nga koronavirusi ditën e sotme në Shqipëri. Mes tyre është shënuar edhe viktima më e re në moshë, vetëm 21-vjeçe.
“Mëngjesin e sotëm ka ndërruar jetë një vajzë e re 21-vjeçare, e cila ndodhej në terapi intensive e intubuar, si pasojë e simptomave të rënda të Covid19. Gjendja e saj u rendua në mënyrë të menjëhershme si pasojë e tromboembolisë fulminante dhe pavarësisht përpjekjeve maksimale të stafit mjekësor, e reja që vuante nga sindromi metabolik, nuk ka arritur të mbijetojë”, thuhet në njoftim.
Gjatë 24 orëve të fundit e ka humbur betejën me sëmundjen edhe një qytetare 49-vjeçare nga Kruja, e intubuar në gjendje të rëndë prej 11 ditësh.
Këtë mëngjes, ministrja Ogerta Manastirliu postoi një foto të saj, teksa fëmijët i kishin dërguar lule me rastin e ditëlindjes në pamundësi për ta parë.
Gjithashtu kanë ndërruar jetë dy qytetarë, 56 dhe 67 vjeç, nga Tirana të intubuar, të cilët nuk e kanë fituar dot betejën me virusin e rrezikshëm.
Deri më tani në Shqipëri kanë humbur jetën 101 persona nga koronavirusi, prej të cilave: Qarku Tiranë 52, Shkodër 17, Durrës 16, Fier 5, Elbasan 5, Vlorë 2, Kukës 1, Lezhë 1, Berat 1, Dibër 1.
