Kryeministri Edi Rama ka folur për mediat, pasi vizitoi ish-Presidentin Hashim Thaçi në burgun e Hagës, ku ai ndodhet prej dhjetorit të vitit 2020. Ish-Presidenti i Kosovës Hashim Thaçi, po mbahet në burg për akuzat e krimeve të luftës dhe krime kundër njerëzimit gjatë luftës së Kosovës. Sot Hashim Thaçi u paraqit para Dhomave Speciale në Hagë lidhur me disa akuza të reja të ngritura ndaj tij, për të cilat u deklarua i pafajshëm.
“Ishte një çmallje e nevojshme. Presidentin Thaçi e gjeta në top formë, i bindur mbase dhe më shumë se sa kur e kam takuar më parë se të vinte këtu, se kjo ishte një rrugë e pashmangshme për të provuar katërcipërisht përpara drejtësisë, pastërtinë e plotë të luftës çlirimtare dhe natyrisht edhe pastërtinë e idealit të luftëtarëve të Ushtrisë Çlirimtare të Kosovës, të udhëheqësve të UÇK-së.
Nuk ka shumë për të thënë. Natyrisht që të gjithë ne jemi të bindur se lufta çlirimtare e Kosovës nuk mund të rishkruhet, dhe as nuk mund kurrsesi të futet në korniza të tjera sepse ajo është tanimë e futur në kornizën e artë të heroizmit, sakrificave, e gjakut të dhënë dhe natyrisht e të gjitha përpjekjeve që kanë vijuar më tej në Kosovën e lirë dhe sovrane”, tha Rama.
