Presidenti i Kosovës, Hashim Thaçi, pas kthimit nga Brukseli, thotë se dialogu mes Kosovës dhe Serbisë do të finalizohet shumë shpejt, me një marrëveshje historike, mes dy vendeve. Deklaratën e fortë Thaçi e bëri në një intervistë për ABC News, ku shtoi gjithashtu se përjashton një krizë institucionale në Kosovë.
“Rifillim i bisedimeve të dy presidentëve për një punë që kam besim se do të finalizohet, kam besim të plotë, me një marrëveshje të madhe historike të normalizimit dhe pajtimit Kosovë dhe Serbi. Nëse ka pasur rezerva më herët, tani pa dallim të gjithë janë për dialog me Serbinë, Edhe spektri që ka qenë totalisht kundër tani është pro dialogut”, tha Thaçi.
Hashim Thaçi ftoi dhe një herë të gjithë spektrin politik në Kosovë, të bëhet pjesë e këtij procesi. Lidhur me zhvillimet politike në vend, Thaçi përjashtoi opsionin e një krize institucionale dhe tha se institucionet së shpejti do të jenë funksionale me krijimin e qeverisë së re.
