Presidenti i Kosovës, Hashim Thaçi u shpreh se deklaratat e disa zyrtarëve serbë ndaj viktimave civile të luftës e dëmtojnë dialogun dhe i minojnë përpjekjet e përbashkëta për pajtim”.
Në një postim në Twitter, Thaçi tha se deklaratat fyese të ministrit të Jashtëm të Serbisë, Ivica Daçiç, dhe të ministrit serb të Mbrojtjes, Aleksandar Vulin, ndaj viktimave civile të luftës, të vrara nga regjimi i Millosheviqit, janë dëshmi se Serbia nuk i ka ndryshuar ende politikat e saj fashiste ndaj Kosovës”.
Daçiç, ka bërë disa deklarata që në Kosovë janë konsideruar si kërcënuese për serbët që i bëjnë të ditura lokacionet e shqiptarëve të varrosur në territorin e Serbisë.
Vulin, në anën tjetër, duke reaguar ndaj një marrëveshjeje midis Kosovës dhe Shqipërisë, që Porti i Durrësit t’i takojë Kosovës, ka thënë se kryeministri Edi Rama, vazhdon me përpjekjet e tij për të krijuar një “Shqipëri të Madhe”.
Ai, duke iu drejtuar shqiptarëve me termin pezhorativ dhe nënçmues “shiptari”, ka thënë se vetëm serbët e bashkuar mund ta ndalojnë formimin e “Shqipërisë së Madhe”.
Offensive statements of Dacic & Vulin twds. civilian victims of the war, murdered by Millosevic’s regime, are proof that Serbia still hasn’t changed its fascist policies twds. #Kosovo. Such actions harm the dialogue & undermine our joint efforts for reconciliation.
— Hashim Thaçi (@HashimThaciRKS) October 5, 2020
