Presidenti i Kosovës, Hashim Thaçi, ka dalë për herë të parë në një komunikim për qytetarët, që nga e mërkura kur zyra e Prokurorit të Posaçëm në Hagë, publikoi njoftimin se ka ngritur akuzat ndaj tij dhe Veselit.
Gjatë fjalës së tij, Thaçi tha se do të japë dorëheqjen dhe do të përballet me akuzat nëse ato konfirmohen. Ai shtoi se nuk ka pasur dhe nuk ka asnjë provë që e lidh atë më ndonjë shkelje krimi. Sipas presidentit të Kosovës, ligji i vetëm që ai ka shkelur ka qenë ai i Sllobodan Millosheviçit.
“Një gjë është e sigurt: nuk ka pasur, dhe nuk mund të ketë, as edhe një provë e vetme drejtuar Hashim Thaçit për shkelje të ndonjë ligji. Ligji i vetëm që kam shkelur është ai i Millosheviçit.
Kosova po hyn në një kapitull të ri dhe në asnjë mënyrë të lehtë. Ky është një kapitull i ri edhe për mua, dhe në këto momente, nuk e di sa e vështirë do të jetë. Por unë jam i gatshëm ta shkruaj këtë kapitull me të vërtetën time para kujtdo”, tha ai.
