Krerët e shteteve të Ballkanit Perëndimor ishin sot në Tiranë, si pjesë e samitit të Brdo-Brijunit. Pas takimit, presidenti Meta zhvilloi një drekë me liderët e Ballkanit Perëndimor, por Hashim Thaçi nuk pranoi të ishte i pranishëm. I ftuar në emisionin “Opinion” në Tv Klan, Thaçi dha arsyen pse nuk mori pjesë.
“Ishte më tepër aspekt teknik, por të takohesha me dy presidentët e dy vendeve që nuk e kanë njohur Kosovën, ishte e panevojshme dhe mendoj se do të ishte e panevojshme vazhdimi i një debati të kotë dhe të thatë. Duke patur parasysh pozicion armiqësor që e mban peng Bosnje Hercegovinën nga Milorad Dodik.
Bosnja Hercegovina për fat të keq ende nuk e ka njohur Kosovën, dhe mban pozicion më të ashpër se Serbia, dhe unë frikësohem se qytetarët nuk kanë të drejtë të mos shkojnë në Bosnje. Edhe kur BE të na japë sinjalin për liberalizimin e vizave, Bosnja do të mbajë pozicionin e Serbisë”, deklaroi Thaçi.
Po kështu, presidenti i Kosovës, Hashim Thaçi i është përgjigjur deklaratave të ish-kryeministrit Sali Berisha, ku e quajti atë “argat të Beogradit”.
Thaçi ka reaguar ashpër, ndërsa tha se Berisha, sipas tij ka bërë mëkate të mëdha gjatë luftës së Kosovës dhe propagandë të egër ndaj UÇK-së.
