Presidenti i Kosovës Hashim Thaçi i ka dërguar një letër kryeministrit ende në detyrë Albin Kurtit.
Çfarë shkruhet në të?
Raportohet se përmes letrës, Thaçi i ka kërkuar Kurtit të propozojë kandidatin e ri për ta mandatuar formimin e Qeverisë.
Në cilësinë e Kreut të Lëvizjes Vetëvendosje e cila fitoi zgjedhjet e 6 tetorit në Kosovë, Thaçi i është drejtuar Kurtit për të formuar qeverinë e re.
Pas votimit të mocionit të mosbesimit në Kuvend, Kurti është shprehur se në bazë të Kushtetutës vendi duhet t’i nënshtrohet zgjedhjeve të jashtëzakonshme dhe jo formimit të një qeverie të re.
Megjithatë përfaqësuesit e të gjithë partive të tjera parlamentare në Kosovë kanë qenë kundër tij përfshi edhe Presidentin Thaçi.
“Ju lutem, në emër të Lëvizjes Vetëvendosje, propozoni kandidatin të ri, të cilin do ta mandator për formimin e Qeverisë së Republikës së Kosovës”, thuhet në letrën e tij të parë, raporton “Klan Kosova”.
Ish-partneri i VV në koalicion, Isa Mustafa ka paralajmëruar se ai do të kërkojë bashkëpunim me AAK-në, Nismën dhe minoritetet për të formuar një qeveri të re. Këtë e ka mbështetur edhe ish-kryeministri Haradinaj i cili ka thënë gjithashtu se nuk do të ketë asnjë post në qeverinë e re.
Kujtojmë se koalicioni VV-LDK u thye pas përplasjes së Albin Kurtit dhe Isa Mustafës për çështjen e tarifave kundër Serbisë dhe më pas shkarkimit të ministrit të Brendshëm të Kosovës i cili ishte emërim i LDK-së.
