Teuta ka fituar betejën e radhës dhe përballë kishte Partizanin të cilin e mposhti me rezultatin1-3 në “Selmanm Stërmasi”. Pavarësisht se “të kuqtë” gjetën të parët golin e avantazhit nuk arritën të administronin lojën dhe nuk e përballuan dot presionin e Teutës, së cilës i duhej vetëm fitorja.
Të kuqtë gjetën të parët avantazhin, në minutën e 16 me anë të Bathës, që shënoi nga pika e 11-metërshit, por më pas durrsakët e Begejës përmbysën gjithçka, duke shënuar plot 3 gola në portën e Hoxhës. Çyrbja, Hrkaç dhe Hila ishin autorët e golave të skuadrës së Teutës, që mori sot një 3-pikësh me shumë vlerë, në kuadër të luftës për mbijetesë në Superiore.
Vllaznia nuk arriti të mbantë atë avantazh të vyer që do ta mbante me pikë të barabarta me Kamzën në garën për mbijetesë, por në fund iu desh të kënaqej me një pikë. Vlonjati Andi Ribaj kaloi në avantazh shkodranët në minutën e 84’, ndërsa më herët Vucaj kishte humbur një penallti, e pritur nga portieri Nurkoviç.
Gjithsesi festa e shkodranëve mbeti në tentativë, pasi në sekondat e fundit të sfidës, ishte Kamara që mposhti Sherrin me një gjuajtje nga hyrja e zonës. Në minutat e fundit kishte shumë tension në fushë, pasi arbitri i takimit nuk bëri një performacë të mirë, duke lejuar vazhdimin e lojës në disa ndërhyrje të egra. Ishin pikërisht lojtarët shkodranë që u favorizuan, por që në fund Camara i befasoi të gjithë.
Pas javës së 32-të, Skënderbeu vijon kryesimin, teksa me humbjen e sotme thjesht sa shtyu festën e titullit, ndërsa Kukësi e Luftëtari konsoliduan pozitat e tyre në zonën europiane. Sa i përket mbijetesës, mund të quhet javë negative për Kamzën, që nuk shkoi më shumë se një barazim pa gola me Luftëtarin në shtëpi dhe tashmë Vllaznia dhe Teuta janë vetëm dy pikë pas saj në renditje.
