Tërmeti i 26 nëntorit ka shkaktuar dëme kolosale edhe tek selia e Kryeministrisë. Sallat ku shpesh herë kemi parë që të organizohen edhe aktivitete të ndryshme janë dëmtuar. Tashmë ka filluar puna për rikonstruksionin e tyre.
Ky fakt është bërë me dije nga zëvendësministri i Infrastrukturës, Artan Shkreli, i cili ka postuar disa foto në rrjetet sociale. Ai thekson se në sallën dopio-volum të hartave, strukturat mbajtëse kanë pësuar plasaritje.
“Kryeministria gjithashtu u troshit nga tërmeti i dt. 26.11.19, dhe në sallën dopio-volum të hartave, strukturat mbajtëse pësuan mjaft plasaritje.
Ishte fat i madh që pikërisht parvjet të dy katet e poshtme – përfshi bazamentin – u përforcuan në pikëpamje konstruktive dhe u sollën në norme sizmike, duke shpëtuar me siguri qëndrueshmërinë e objektit.
Tani kjo sallë e bukur, me karakter të theksuar monumental, po i nënshtrohet rehabilitimit dhe përforcimit me fibra karboni”, shkruan Shkreli.
