Përfaqësuesit e PD, Orjola Pampuri dhe pedagogu Ndriçim Mehmeti i Departamentit të Arsimit, kanë denoncuar mungesën e transparencës nga Bashkia e Tiranës për gjendjen në shkolla e kopshte, pas tërmetit të 26 nëntorit.
Orjola Pampuri ishte e pranishme në kopshtin 42, i rikonstruktuar 4 vjet më parë nga Bashkia Tiranë. Ndërsa Ndriçim Mehmeti ishte tek shkolla “Kongresi i Lushnjës”, për të cilën kryebashkiaku Erion Veliaj tha se pas rikonstruksionit, ishte kthyer në një nga shkollat më të mira të Tiranës.
PD kërkoi verifikimin e të gjitha shkollave dhe kopshteve të Tiranës. Po kështu kërkuan nga Prokuroria të hetojë pa vonesë, për të vënë para drejtësisë këdo që përmes vjedhjes dhe abuzimit, ka vënë në rrezik jetën e fëmijëve.
