Një tërmet i fuqishëm me magnitudë 5.3 ballë i shkallës Rihter ka goditur ditën e sotme Kroacinë.
Instituti i Mjekësisë Emergjente ka konfirmuar se si pasojë e tërmetit, një 15-vjeçar ka ndërruar jetë.
Epiqendra e tërmetit ishte në veri të Zagrebit me thellësi 10 kilometra.
Qeveria kroate përmes një postimi në Twitter u bëri thirrje qytetarëve që të “qëndrojnë të qetë” dhe “të respektojnë distancat” për shkak të koronavirusit.
“Ne u bëjmë thirrje qytetarëve të qytetit të Zagrebit të cilët dolën pas tërmetit, ruajeni distancën me njëri-tjetrin. Ne e dimë se jeni të shqetësuar, por mbani në mend situatën në të cilën gjendemi të gjithë. Ndiqni udhëzimet e shërbimeve të qytetit dhe institucioneve përkatëse, por para së gjithash, edhe një herë, ruajeni distancën tuaj”, thuhej në njoftimin e qeverisë.
