Gjatë natës, një tërmet i fuqishëm është ndjerë në Greqi. Tërmeti ishte me magnitudë 5.6 të shkallës rihter. Sipas Institutit Gjeodinamik të Observatorit Kombëtar të Athinës, lëkundjet e forta janë regjistruar në orën 02.49 (lokale) në veri-lindje të Pargës, rreth 47 km nga Janina.
Thellësia e tërmetit ka qenë 10 kilometra. Sipas mediave greke, tërmeti ka shkaktuar dëme serioze në Kanallaki. Mësohet se janë shembur disa shtëpi të vjetra. Ndërkohë, bëhet me dije se janë plagosur dy persona. Po ashtu, lëkundjet e forta janë ndjerë edhe në Shqipëri.
Eksperti i njohur i sizmiologjisë në Greqi, Efthimios Lekkas, ka deklaruar se janë të shqetësuar pasi magnituda e tërmetit filloi të rritej.
“Jemi të shqetësuar pasi nisi në një pikë të ulët, 4.2 në shkallën Rihter rreth mesnatës dhe arriti në 5.6 të shkallës Rihter. Po e ndjekim fenomenin dhe jemi skeptikë”, është shprehur ai.
Grekët po ndjejnë edhe pasojat nga koronavirusi, ndërsa u është kërkuar që të vetë-zolohen, që virusi mos të gjejë shtrirje. Në Greqi, 10 persona kanë humbur jetën nga koronavirusi.
Numri i viktimave nga koronavirusi, i njohur ndryshe edhe si Covid-19 nga OBSH, vijon të rritet ndjeshëm.
Autoritetet kanë konfirmuar se numri i të infektuarëve në mbarë botën i ka kaluar 276 mijë, ndërsa numri i të vdekurve ka shkuar në 11.417.
