Drejtori i Emergjencave Civile, Haki Çako, ka deklaruar se deri më tani janë strehuar 7000 persona në hotele apo ambiente të mbyllura dhe të sigurta.
Në një prononcim për A2, Çako theksoi se kanë kërkuar ndihmën e ekspertëve për të përcaktuar nëse banesat janë të banueshme apo jo. Ai bëri me dije se do të fillojë puna për eliminimin e rrënojave.
“Po shfrytëzojmë të gjitha kapacitetet e mundshme dhe falenderoj të gjitha subjektet dhe qytetarët që kanë vënë në dispozicion mundësitë e veta. Akomodimi po vazhdon. Ne kemi kërkuar ekspertiza edhe nga vendet partnere për çështjet inxhinierike. Për ato që nuk janë të banueshme, nuk do të lejojmë banimin aty. Në pjesën tjetër, pas disa kohe banorët do të kthehen në shtëpitë e tyre. Do të vazhdojmë të trajtojmë qytetarët dhe do të nisim eliminimin e rrënojave. Më pas, do të shemben banesat e pabanueshme dhe do të rindërtohen”, tha ai.
