Ministria e Shëndetësisë ka dhënë informacion për gjendjen e të lënduarve, pas tërmetit shkatërrimtar të 26 nëntorit. Në njoftim citohet fakti se 19 pacientë ende janë duke marrë mjekim në spitali, dhe 3 të tjerë po mjekohen jashtë vendit. Po kështu, 1.700 fëmijë po marrin shërbim psiko-social nga 300 psikologë dhe punonjës socialë në të gjithë qendrat e akomodimit, ku janë vendosur familjet e prekura nga tërmeti.
“Si pasojë e tërmetit u trajtuan në spitale 913 qytetarë, dhe aktualisht nën kujdesin e mjekëve vazhdojnë të jenë 19 pacientë, kurse 3 pacientë janë transferuar për trajtim të specializuar jashtë vendit.
3.900 vizita mjekësore janë kryer nga stafet mjekësore dhe infermierore në njësitë akomoduese në zonat e prekura nga tërmeti. Në këto njësi akomoduese janë vaksinuar 900 qytetarë, ndërkohë që 402 të sëmurëve kronikë u është mundësuar ofrimi i barnave me rimbursim.
1.700 fëmijë po marrin shërbim psiko-social nga 300 psikologë dhe punonjës sociale në të gjithë qendrat e akomodimit, ku janë vendosur familjet e prekura nga tërmeti”, thuhet në njoftimin e Ministrisë së Shëndetësisë.
