Ekipi i Mekanizmit të Mbrojtjes Civile të Bashkimit Evropian, së bashku me autoritetet shqiptare do të koordinojnë ndihmën për familjet që u dëmtuan si pasojë e tërmeteve që goditën vendin fundjavën e shkuar.
Përmes koordinimit të Bashkimit Evropian, furnizimet e ndihmës së parë dhe sendet e ndihmës, si tendat e emergjencës, gjeneratorët e energjisë elektrike dhe kutitë e ndihmave ushqimore tashmë janë nisur drejt zonave të prekura.
Ambasadori i Bashkimit Evropian në Tiranë, Luigi Soreca ka përgëzuar reagimin e autoriteteve, ndërsa shton se “BE është afër Shqipërisë në këtë kohë të vështirë”.
“Shqipëria nuk është vetëm gjeografikisht afër BE-së, por edhe afër zemrave tona. Përgëzoj reagimin e shpejtë të autoriteteve qendrore dhe lokale shqiptare pas tërmetit dhe bujarisë dhe shpejtësisë së shteteve anëtare të BE-së. Bashkimi Evropian është afër Shqipërisë në këtë kohë të vështirë”, deklaroi Soreca.
