Deputeti i Partisë Demokratike, Flamur Noka, e ka cilësuar si të turpshme dhe të neverishme aktin e kyçjes së dyerve të PD-së. Disa anëtarë të Komisionit të Rithemelimit të PD-së kanë mbërritur në selinë blu, pas përfundimit të afatit që i kishin vendosur kryedemokratit Lulzim Basha për të liruar zyrën. Flamur Noka, Luçiano Boçi, Tritan Shehu, Luan Baçi dhe të tjerë i kanë provuar të gjithë dyert për të hyrë në seli, por ato kanë qenë të kyçura. Më herët, dera kryesore nuk u hap as për nënkryetaren Jorida Tabaku.
“Ajo që po konstatojmë me dhimbje është se shtëpisë së lirisë, PD-së, sot duhet të ishte një ambient ku të gumëzhinte, ambient festiv ku të mblidheshin gjithë demokratët. Për fat të keq, Edi Rama e ka kthyer me pengun e tij në një alkatrazë të kohëve moderne. I patë vetë gjithçka e mbyllur, të gjitha dyert e mbyllura. Gjithçka e blinduar, a thua se e ka kthyer PD-në në një burg të sigurisë së lartë. Kjo e turpshme, e neveritshme.
Pengu i Ramës mund të rrijë i vetëburgosur ose Rama ia ka krijuar kushtet e një burgu të sigurisë së lartë për ta vetëburgosur pengun e tij, si mënrya më e mirë që ai të zgjasë ditët e pushtetit”, tha Noka.
Flamur Noka: Data 8 do jetë një ditë që demokratët do marrin frymë lirisht, jo nga qelitë e alkatrazit por nga shtëpia e lirisë. Në mënyrën më paqësore në datën 8 demokratët nga alkatraz do e kthejnë në shtëpi lirie këtë seli.
Si do e nxirrni nga zyra kur jane te blinduara?
Flamur Noka: Mendoni se në demokraci blindi është zgjidhje? E dini kush është zgjidhja në demokraci? Vota e shumica, është mjeran ai që mendon se fshihet duke u vetëburgosur me ndihmën e Ramës.
A po shkohet drejt një përplasje?
Flamur Noka: Unë nuk shoh gjëkundi përplasje. Një njeri i vetëm s’mund të ketë përplasje me gjithë demokratët.
