Tre krerët e fuqive perëndimore, Gjermanisë, Anglisë dhe Francës i kanë drejtuar një kërkesë të përbashkët Iranit.
Nëpërmjet një deklarate për shtyp e miratuar nga Merkel, Macron dhe Johnson, njoftohet se: I është kërkuar Iranit që të respektojë zotimet e veta në marrëveshjen bërthamore të nënshkruar në vitin 2015. Në këmbim fuqitë e mëdha do të heqin sanksionet e vendosura ndaj Republikës Islamike.
Kjo kërkesë e liderëve të Evropës vjen pas deklaratave të javës së kaluar të Teheranit zyrtar, ku njoftoi se do të tërhiqet nga marrëveshja e nënshkruar në 2015, në shenjë hakmarrje për vrasjen e gjeneralit Qasem Soleimani.
Evropa e bashkuar i ka bërë thirrje Iranit që të angazhohet nëpërmjet diplomacisë dhe të heqë dorë nga aktivitetet destabilizuese në rajon, çka nënkupton ndalimin e programit bërthamor.
Nga ana tjetër, Sekretari amerikan i mbrojtjes, Mark Esper, tha të dielën se Shtetet e Bashkuara janë të përgatitura për bisedime të hapura dhe pa kushte me Iranin.
