Tensione të shumta ka pasur mëngjesin e sotëm në Kamëz, ku një grup militantësh të PD-së kanë tentuar të thyejnë portën e një shkolle ku ishin vendosur materialet zgjedhore të KZAZ-së.
Mes tyre dhe policisë ka pasur përplasje, e cila arriti kulmin kur u arrit të hapet porta e shkollës. Policia ka përdorur gaz lotsjellës për të shpërndarë militantët dhe për të mos i lejuar të futen në ambientet e KZAZ-së.
Ndërsa efektivët e rendit janë pajisur me maska anti-gaz, policët bashkiakë ishin të papërgatitur. Një prej tyre ka përfunduar në spital pasi humbi ndjenjat pas hedhjes së gazit lotsjellës. Në ndihmë i erdhën qytetarët të cilët e transportuan me makinë private për në spital.
