Kryetarja e Kuvendit Lindita Nikolla do përjashtojë për 10 ditë dy deputetë të PD-së. Bëhet fjalë për deputetët Edi Paloka dhe Bujar Leskaj.
Sipas Partisë Socialiste, ata kanë hyrë në Kuvend të dehur. Sipas informacioneve, dy deputetët para se të hynin në sallën e Parlamentit kishin konsumuar alkool në kafen e Kuvendit.
Për këtë, deputetët e PS po mbledhin firmat për procedim disiplinor të dy deputetëve dhe për përjashtimin 10 ditor te tyre.
Pak para se të niste procesi i votimit për buxhetin 2023 dhe projektligjet e paketës fiskale, në Kuvend ka pasur një përplasje dhe tensione mes kryeministrit Rama dhe deputetëve.
Bëhet me dije se sherri ka nisur pasi kryeministri Rama ka thënë se dy deputetët kanë qenë të pirë, ndërkohë që situata ka agravuar me tone të ashpra më pas në Kuvend.
