Deputetët e opozitës parlamentare kanë bllokuar ditën e sotme foltoren e Kuvendit, pasi kryeparlamentari, Gramoz Ruçi nuk i dha fjalën deputetit Myslym Murrizi.
Ky i fundit u ngrit pas fjalës së deputetit Edmond Stojku, duke shkuar në drejtim të foltores duke kundërshtuar rendin e ditës. Ai i kërkoi Ruçit për replikë pasi i ishte përmendur emri nga kryeminsitri Rama më herët.
Ruçi e paralajmëroi Murrizin se do merreshin masa ndaj tij nëse vijon të bllokonte foltoren. Por, pas Murrizit janë ngritur edhe deputetët e tjerë të opozitës parlamentare duke bërë që tek foltorja të shkojnë edhe gardistët.
“Uluni, ju lutem. Ju të shërbimit ulni, Ikni andej. Nëse doni të dëgjoni, zotit Gjuzi i dhashë fjalën se kishte fjalën, po për replikë. E dyta; kini në dispozicion dhe 15 minuta për çështjet që do hapej. Flisni për se të doni dhe për çfarë të doni. Do ju jap fjalën menjëherë, ulni! Do marr masa. Do të jap vërejtje. Po pres dy minuta, do përjashtohesh nga salla. Grupi i maxhorancës kërkon 5 minuta pushim”, tha Ruçi.
