Pas artistëve, Policia e Tiranës ka proceduar penalisht për protestën e djeshme kreun demokrat, Lulzim Basha, kryetaren e LSI Monika Kryemadhi, Fatmir Mediun, Çlirim Gjatën e disa eksponentë të tjerë politikë.
Basha dhe Kryemadhi janë proceduar penalisht, për pjesëmarrjen në protestën e organizuar nga Aleanca për Mbrojtjen e Teatrit.
Sipas informacioneve, Basha dhe Kryemadhi janë proceduar në gjendje të lirë. Po kështu edhe kryetari i Partisë Republikane, Fatmir Mediu dhe sekretari për çështjet ligjore Çlirim Gjata.
Procedimet kanë nisur për Robert Budinën, Neritan Liçajn, Adriana Kalaja, Artan Manushaqa dhe Arkimed Lushaj, i njohur ndryshe si Stresi.
“Procedimi ndaj tyre nisi pasi më datë 18 maj 2020, rreth orës 16:30, kanë protestuar në mënyrë të paligjshme, pa lejen e organeve kompetente, duke prishur rendin dhe qetësinë publike, aq më tepër në situatë të jashtëzakonshme në kohë pandemie, ku ndalohen me ligj grumbullimet apo tubimet”, thuhet në njoftimin e policisë së Tiranës.
