Nga Anxhela Ferra
Artistët e Aleancës për Mbrojtjen e Teatrit Kombëtar janë ngritur sërish, kësaj radhe pas heqjes së gërmave në pjesën ballore të godinës. Ata u shprehën se gjithçka ndodhi në darkë dhe ende nuk dihet se cilët janë përgjegjësit. Për këtë arsye ata bënë sot një padi penale në prokurorinë e Tiranës.
Prej më shumë se 1 viti bashkë me artistët që kërkojnë ruajtjen e Teatrit janë edhe njerëz të shoqërisë civile. Aktivisti Besjan Pesha në një intervistë për Tirana Today akuzon Bashkinë e Tiranës si përgjegjëse, duke shtuar se institucionet qeverisëse në këto momente nuk kanë asnjë të drejtë ligjore të vazhdojnë me shembjen. Por, sipas tij nëse vazhdohet me këto veprime, Bashkia apo Qeveria do të përballen me zemëratën e njerëzve.
“Heqja e gërmave është diçka perverse. Sepse të shkosh e të grabisësh gërmat natën tek Teatri Kombëtar tregon që ke një problem të madh me veten dhe me godinën. Ne dje kemi analizuar edhe mes miqsh, nëse kanë ndonjë vlerë në treg ato gërma. Dhe në fakt na rezulton që ato nuk kanë asnjë lloj vlere. Dhe dikush nuk do të rrezikonte të shkonte të vidhte ato gërma, veçanërisht përballë Ministrisë së Brendshme.
Ndaj mbetet varianti tjetër që Bashkia e Tiranës ka shkuar aty natën dhe i ka hequr. Nëse e ka bërë këtë gjë për të provokuar dhe parë nëse reagimi vazhdon të jetë i njëjtë. Apo i kanë hequr sepse duan të japin një sinjal që edhe pse janë djegur gjitha fatet ata janë të vendosur për të shembur teatrin, ne nuk e dimë.
Por, ajo që dimë është që dje është shkelur ligji. Ndërkohë nga pikëpamja ligjore qeveria dhe Bashkia nuk e shembin dot teatrin. Tani a mund të bjerë një “zjarr” aksidentalisht, edhe mundet. Siç shkuan natën që hoqën gërmat, lehtë mund t’i vënë e zjarrin.”
Gjatë fillimit të protestave nga artistët, ishte shumë i lartë numri i këtyre të fundit që e kundërshtonin shembjen e teatrit. Por, më pas qëndrimi i tyre ndryshoi. Këtë gjë Pesha ia atribuon kryetarit të Bashkisë, i cili sipas tij pjesën më të madhe të artistëve i ka shantazhuar. Por, përsëri ai shton se edhe ata që nuk flasin më në publik kundër shembjes, në të vërtetë e kundërshtojnë prishjen e godinës.
“Forma e propagandës që ka zgjedhur qeveria në përgjithësi është që ata të cilët janë pro çdo lloj argumenti që jep qeveria janë njerëz të mirë. Dhe gjithë ata që kanë mendim ndryshe janë ca njerëz imoralë e të pacipë. Edhe ajo që bënë me artistët ishte e neveritshme, sepse u futën e i morën një nga një. Disa u kërcënuan, disa u blenë, ca u shantazhuan.
Unë kam pasur kontakte edhe me ata artistë të cilët u duk se dolën pro shembjes së teatrit. Por, ata nuk ndryshuan mendim nga fillimi, thjesht kanë ndryshuar qëndrim. Dhe shumica e kanë bërë këtë nga halli e jo nga qejfi. Pasi statusi i një artisti këtu në Shqipëri është shumë i dobët dhe ata nuk janë dot plotësisht të lirë.”
Pesha bën përgjegjës kryetarin Veliaj si shkaktarin për shtimin pa kriter të ndërtimeve, duke thënë se kështu e ka kthyer në një qytet pa oksigjen.
“Ka filluar një sulm, një agresivitet ndaj gjithë zonës historike të Tiranës, duke e zhvlerësuar. Duke iu thënë qytetarëve që këto janë thjeshtë ca objekte, pa asnjë vlerë e rrënoja të vjetra dhe shihni sa të bukura do i bëjmë ne kullat tona. Kjo mania për të ndërtuar vetëm në qendër është e tmerrshme. Po të shihni qendra është bërë e pajetueshme. Nuk ke ku parkon, nuk ka vende nëpër shkolla a çerdhe, ajri është super i ndotur.
Nëse zhvillimi i Tiranës, apo qoftë edhe për teatrin do të zgjidhej me një referendum, ku të pyeteshin qytetarët, do të ishte gjithçka demokratike. Jo, kështu ku vendosin vetëm disa njerëz. Tirana sot është e mbi-ndërtuar, Veliaj ka dhënë më shumë leje ndërtimi se çdo kryetar tjetër në katër vite me mbi 800 leje. Nuk është më një qytet që ka më shumë oksigjen, por ka më pak. Dhe kjo rëndon mbi supet e Erion Veliajt.”/ TIRANA TODAY
