Për të mbajtur situatën nën kontroll, policia duket se do të izolojë çdo rast që mund të tentojë të shkaktojë kaos në protestën e sotme.
Drejtues të Policisë së Tiranës dhe Departamentit të Antiterrorit, sapo kanë përfunduar një mbledhje në Ministrinë e Brendshme, përsa i përket menaxhimit të situatës lidhur me protestën për Teatrin.
Duket se situata do të jetë e mirëmenaxhuar, pasi do të angazhohen rreth 1 mijë efektivë.
Në shërbim të përforcuar do jenë gjithë komisariatet e Tiranës, raporton “Ora News”.
Po kështu FNSH, RENEA dhe forca të gatshme nga qytetet e tjera do të jenë në gatishmëri në rast se do ketë nevojë.
Aleanca për Mbrojtjen e Teatrit ka thirrur protestë sot në orën 16:30, të cilës do ti bashkohet edhe opozita.
“Protestë kundër vrasjes sonë”, tha dje regjisori Robert Budina.
” Ju ftoj që ta shpëtoni fatin tonë të përbashkët, se kur jemi bashkë do jetë e vështirë për të na mposhtur. Kemi kaluar në diktaturë, përballë Ministrisë së Brendshme, se ka tentuar për vrasje. Po protestojmë kundër vrasjes. Nuk do kërkojmë leje, sendet tona i kemi brenda, nuk kemi pse të kërkojmë leje, i kemi shkëputur marrëdhëniet me qeverinë. Kemi video, mua më kapën brenda në godinë, shkelën me këmbë një zonjë që u rrëzua, na gjëmuan, na ndoqën, na nxorën me dhunë dhe meqë ishte errësirë na dhunuan. Policia po gënjen haptazi për të shtrembëruar atë që ndodhi. Ftojmë nesër (SOT) popullin e Tiranës, që të shpëtojmë fatin tonë, kundër tentativës së vrasjes”, tha Budina.
