Dy vëllezër nga Pogradeci u gjetën të vrarë në një kanal vaditës, në një parcelë në fshatin Zvirinë dy ditë pasi ishin larguar nga shtëpia. Detaje të reja janë hedhur në dritë lidhur me ngjarjen e rëndë ku mbetën të vrarë dy vëllezërit, Andrea dhe Martin Olldashi.
Burimet bëjnë me dije se në vendin e ngjarjes janë gjetur gëzhoja. Viktimat janë qëlluar me armë në kokë dhe në gjoks. Dyshimet janë që ata janë ekzekutuar pikërisht të ai vend, për shkak edhe të terrenit, në mes të arrave dhe larg banesave.
Andrea Olldashi 33 vjeç, ka qenë me precedentë penalë, pasi ka qenë edhe i dënuar për vjedhje ku në 2018 ka dalë nga burgu, ndërsa i vëllai Martin Olldashi s’ka precedentë.
Bëhet me dije se krahas policisë së Korçës, dhe komisariatit të Maliqit dhe Pogradecit, po hetohet edhe nga Krimet e Rënda të Tiranës. Dy vëllezërit ishin larguar nga banesa e tyre që prej mbrëmjes së 7 dhjetorit, dhe deri në gjetjen e trupave të pajetë nuk ka patur asnjë informacion për ta. Të rinjtë 31 dhe 33 vjeç, u gjeten në afërsi të vendit të quajtur “Kisha e vogël”.
Në banesën e dy vëllezërve Olldashi, janë hapur dyert e mortit. Nëna e tyre, Ëngjëllushe Olldashi, është në një gjendje të rënduar psikologjike. Lajmin e kobshëm ajo e ka mësuar nga televizori, ndërsa prej orësh të tëra vajton humbjen e djemve të saj duke apeluar që ngjarja të zbardhet. Ajo ka treguar për mediat se kishte bërë denoncim në polici, për zhdukjen e tyre.
