Gjatë një takimi me shoqatat e veteranëve, Rama ka folur për debatin për krimet gjatë Luftës dhe regjimit diktatorial. Kryeministri u shpreh se ka një vijë ndarëse mes ngjarjeve të Luftës Anti-Fashiste, dhe asaj që ndodhi pas luftës me regjimin diktatorial. Për Ramën, Lufta Anti-Fashiste Nacional Çlirimtare renditi Shqipërinë në anën e duhur të historisë, ndërkohë që sipas tij, ajo që solli pas lufta nuk është ana e duhur e historisë.
“Për mua ka një vijë ndarëse mes luftës dhe historiografisë pas luftës. Do doja që asnjëherë të mos ngatërrojmë atë që buron nga gjaku i pastër i Luftës Anti-Fashiste, me atë që buron nga gjakderdhja e gjakut të pafajshëm të pas luftës, për shkak të një regjimi diktatorial.
Këto gjëra duhet të jenë të ndara, për të qenë vijimisht në anën e duhur të historisë. Ajo që bëri Lufta Anti-Fashiste, ishte vendosja e shqiptarëve në anën e duhur të historisë. Ajo që prodhoi pas lufta, nuk mund të themi që është ana e duhur e historisë. Ajo që marrim si amanet dhe si mesazh nga Lufta Anti-Fashiste, është ajo ç’ka e ktheu Shqipërinë në rrugën e ëndërruar nga Qemal Stafa dhe shumë të tjerë, ëndrrën e një Shqipërie të drejtë dhe Europiane, ku shanset jepen të gjitha për të barabartët.
Amaneti i Dëshmorëve të luftës, mishërohet në të gjitha domosdoshmëritë e të lëna pas dore gjatë viteve, për të krijuar një sistem funksional demokratik, ku secili të vlerësohet sipas meritës dhe të shpërblehet sipas punës”, ka thënë Rama.
Rama nderoi sakrificën e Dëshmorëve të Atdheut, dhe rikonfirmoi angazhimin e mazhorancës për të përmbushur amanetin për një Shqipëri Europiane.
“Jemi këtu sot për të vlerësuar jo me fjalë të bukura, por me përpjekje, për të përcjellë me vepra amanetin e Dëshmorëve.
Natyrisht është pak, por është e sigurt që vlerësimi dhe shpërblimi për ata që janë më të moshuar, për brezin e tretë, për ata që kanë dhënë gjithçka kanë mundur, dhe kanë marrë shumë më pak sa kanë merituar, përballet me kufirin e pamundësive, por ama unë e lexoj shumë mirë amanetin e atyre që ranë Dëshmorë.
Të sakrifikosh sot do të thotë të mendosh për ata që janë fare të vegjël. Të mos e trajtosh sot atë tërësi mundësish që ke, do të thotë ti japësh mundësi të rinjve për më shumë nesër. Ne jemi të vetëdijshëm që pensionet janë të ulëta, që shpërblimet nuk janë të larta, dhe që rrogat nuk janë ato që ne do donim të ishin. Ne duhet të bëjmë më shumë sakrifica sot, që fëmijët mos të paguajnë borxhe sot siç paguajnë fëmijët e ’90-ës”, tha Rama.
