Çdo orë që kalon, i tremb më shumë banorët, të cilët po bëjnë apel për ndihmë nga shteti. Në zonën e ish-Kënetës ka ende ndërtesa të tjera, që rrezikojnë të shemben. Shumë prej tyre kanë pësuar dëme që nga tërmeti i 21 shtatorit, dhe tani janë të pabanuara. Një qytetare ka apeluar që të prishet një ndërtesë, e cila është jashtë funksionit, pasi vë në rrezik jetën e vajzës së saj.
Një e moshuar nga lagjja nr.18, bën apel që të ndërhyhet për të larguar një shtëpi të prishur në këtë zonë, pasi sipas saj, ajo rrezikon të shkatërrojë banesën e vajzës së saj.
Ajo thotë se rënia e saj mund të kthehet në tragjike për jetën e së bijës, dhe fëmijëve të saj. Zëri i së moshuarës nuk është dëgjuar, ndonëse ka tre ditë që kërkon ndihmë.
“Kam frikë për jetën e vajzës dhe të fëmijëve. Nuk kam hall, sepse le të rrinë rrugëve, por t’ia largojnë atë banesën e shkatërruar. Banesa është ngjitur me të. Ne kemi tre ditë që bëjmë thirrje.
Të vijnë këtu në lagjen nr.18. Kemi çuar numra telefonash, dhe nuk është marrë fare kush me to. Tani a nuk bën me e shemb atë ndërtesë. Të vdekurit vdiqën, ju po i vdisni edhe të tjerët. Të paktën të gjallët të mbani, dhe jo t’i kaloni në depresion”, tha e moshuara për mikrofonin e “News24”.
