Në kohëra të ndryshëm brezat të ndryshëm gjithmonë kanë qenë në konflikt njëri me tjetrën. Veçanërisht mes të rinjve dhe moshës së tretë, ekziston një hendek i madh në mënyrën e perceptimit. Duke nisur nga veshja, te sjellja, te përditshmëria, vendet që frekuentohen.
Këto diferenca vihen re më së miri në Shqipëri, ku mentaliteti i moshës së tretë jo pak herë është i prapambetur për të rinjtë. Skundër edhe për gjyshërit apo gjyshet tona, të cilët shpesh shprehen se disa evoluime nga të rinjtë janë të papranueshme.
Ata thonë për Tirana Today se një nga gjërat që i bezdis më tepër është look-u i të rinjve të sotëm. Trende të ndryshme si pantallonat e grisura, veshjet ndonjëherë ekstravagante janë të tepruara.
“Të rinjtë të mbledhin mendjen. Dalin çupat me pantallonat e grisura, duhet pak tolerancë dhe jo aq lirshëm. Kurse djemtë janë më të rregullt, ata janë djem dhe i lejohet të veshin pantallona të grisura. Kurse vajzave nuk iu shkon, ato duhet të vishen më thjeshtë.”
“Kush të linte atëherë të dilje me minifunde e të zhvisheshe. Edhe pse ka qenë e kontrolluar dhe jo e lirë, ka qenë më mirë atëherë se tani. Neve nuk na pëlqen me pantallona të grisura. Burri është burrë dhe gruaja është grua. Ajo i mban flokët e gjata se i shkojnë, por tani i lënë dhe burrat, madje kapin dhe ndonjë bisht. I shohim të rinjtë që kalojnë apo ulen dhe puthen në publik. Kjo nuk ka lezet, duhet të kenë më tepër seriozitet.”
Ndërkohë të pakët janë ata të cilët janë më mëndje hapur dhe me humor përgjigjen se kohët kanë ndryshuar dhe të gjithë duhet të përshtaten.
“Nuk ka pse të jetë turp se veshin pantallona të grisura, madje ajo është higjienike. Nuk janë kot ato, hyn ajri. Shumica e të rinjve janë të mrekullueshëm. Janë më të mirë nga ata që themi ne në kohën e Enverit. Nëse një djalë do të ishte me mjekër, me tatuazhe apo të vishej bukur, do thërritej he do të përjashtohej nga shoqëria.”
Teksa gjatë viteve të komunizmit të rinjtë nuk kanë qenë të lirë, madje ata thonë për Tirana Today se gjithë kohën ishin nën vëzhgim. Sot kohët kanë ndryshuar, përherë e më tepër të rinjtë janë të pavarur, madje që në moshë të hershme. Por, kjo gjë ndonjëherë është kthyer dhe në disavantazh. Pasi ndikon në sjelljen, ku sipas të moshuarve, po i bën dëm të rinjve dhe shoqërisë.
“Një pjesë e të rinjve janë mirë, pjesa tjetër jo. Kanë tangërllik, shumë mendjemadhësi, përdorin veshje pak ekstravagante. Nuk më pëlqen shumë, madje kur shoh çifte që puthen më bezdis, sepse është gjë e turpshme.”
“Ça të thuash për të rinjtë, duhet ta mendojnë mirë dhe ta dinë që kjo jetë nuk është në rregull. Nuk ka rëndësi veshja, duhet të kenë kujdes për gjërat që bëjnë. Sepse nuk janë duke u sjellë mirë, janë duke marr për kot.”/ TIRANA TODAY
