Depresioni është një çrregullim i përhapur i shëndetit mendor, që mund të prekë thuajse cilindo në një vend. Simptomat e tij të shumta, e pengojnë një person të sillet normalisht në ambiente sociale, në punë, shkollë etj. Aktualisht 3.8 % e popullsisë së botës, ose mbi 300 milionë njerëz vuajnë nga depresioni.
Të rinjtë e moshës 18–22 vjeç, janë grupmosha më e mundshme për t’u prekur nga kjo sëmundje. Kostoja totale e shkaktuar nga depresioni është 210.5 miliardë dollarë në vit në mbarë botën. Gati 35% e të rriturve që kanë përjetuar një episod të madh depresiv, nuk kanë marrë trajtim. Deri në vitin 2030, si rezultat i depresionit, mendohet se do të humbasin mbi 12 miliardë ditë pune.
Miliona të rritur, do të preken nga depresioni në një moment të jetës së tyre
Statistikat tregojnë se me kalimin e kohës, 1 në 13 njerëz do të përjetojnë një episod depresiv psikotik para moshës 75 vjeçare. Nivelet e depresionit kronik ndryshojnë në nivelin e ashpërsisë, dhe ndonjëherë mund të kërkojnë edhe shtrimin në spital. Depresioni psikotik, është një gjendje shumë më e rëndë e depresionit ose çrregullimit bipolar, dhe mund të përfshijë halucinacionet, deluzionin ose paranojën.
Gjysma e njerëzve që preken nga depresioni, mund të kenë ndërkohë edhe çrregullim ankthi
Depresioni, mund të shoqërohet shpesh edhe me çrregullim të rëndë të ankthit. Ndryshimet e humorit, ndikojnë seriozisht në jetesën e përditshme. Një çrregullim ankthi mund të shkaktojë ndjenja nervozizmi ose paniku, rrahje të shpejtë të zemrës, gulçim, marramendje dhe të vjella.
Nga depresioni, preken shpesh ata që kanë probleme të tjera shëndetësore
Sipas statistikave në shkallë botërore, 25% e pacientëve që janë prekur nga tumori, kanë përjetuar depresion. Po ashtu 10- 27% e pacientëve, që kanë pësuar goditje në tru, dhe 33% e mbijetuarve nga një sulm në zemër, preken nga depresioni. Edhe ata që kanë dhimbje kronike nga sëmundje të ndryshme, ka shumë të ngjarë të zhyten në depresion.
Gratë janë 2-fish më të prekura se burrat
Shumë njerëz, besojnë se burrat vuajnë më shpesh sesa gratë nga ky çrregullim shëndetësor. Në fakt, studimet e kryera nga OBSH, tregojnë se më shumë gra preken nga depresioni sesa burrat. Për më tepër, gratë kanë 2 herë më shumë të ngjarë të kenë një MDE (episod të madh depresiv).
50% e grave që diagnostikohen me depresion pas lindjes, nisin të vërejnë simptoma që gjatë shtatzanisë
Ndërsa është e zakonshme që gratë të vuajnë nga disa simptoma pas lindjes, siç është vetmia ose stresi, depresioni post-partum, mund të jetë më i rëndë dhe problematik. Ajo që njerëzit shpesh nuk kuptojnë, është se sipas disa raporteve dhe studimeve; të bazuara edhe në statistikat e shëndetit mendor të vitit 2018, këto simptoma shfaqen më herët nga sa mendohet, madje që gjatë shtatzënisë.
Depresioni mund të çojë në vetëvrasje
Rreth 800.000 njerëz vdesin çdo vit për shkak të vetëvrasjes. Për më tepër, sipas statistikave të Organizatës Botërore të Shëndetit, depresioni është dëshmuar se çon drejt vetëvrasjes. Edhe më shqetësues, është fakti se vetëvrasja është shkaku i dytë kryesor i vdekjes tek të rinjtë e moshës 15-29 vjeçare.
Depresioni, mund të shkurtojë jetën e pacientëve të sëmurë me kancer
25% e pacientëve të sëmurë me kancer, preken nga depresioni, pikërisht për shkak të gjendjes së tyre mjekësore. Por sipas studimeve, depresioni gjithashtu mund të shkurtojë jetën e këtyre pacientëve. Për këtë arsye, shumë pacientë kalojnë nëpër trajtime të ndryshme psikologjike.
Vendi më depresiv në botë është India
Vendi me më shumë njerëz në depresion në botë, me 6.5 % të popullsisë, është India. Sipas raportit të Organizatës Botërore të Shëndetësisë, popullsi e madhe është njëri nga faktorët. Faktorë të tjerë janë varfëria, kujdesi i dobët shëndetësor, ndotja mjedisore etj./ TIRANA TODAY
