Ish-deputetja e Partisë Demokratike, Dhurata Çupi, ka komentuar situatën politike në vend, teksa shprehet se normaliteti nëpër bashki do kthehet vetëm nëse në Shqipëri, do ketë zgjedhje të lira e të ndershme.
E ftuar në rubrikën “Opinion” në News24, Çupi foli edhe rreth situatës së tensionuar në Bashkinë e Devollit duke deklaruar se kryebashkiakët do vijojnë të qëndrojnë në detyrë derisa të zhvillohen zgjedhje të ndershme.
“Kryetari i bashkisë qëndron në detyrë derisa të zhvillohen zgjedhje të ndershme. Si mund të pranojnë qytetarët e Shkodrës? Ne do presim të ngrihet Gjykata Kushtetuese. As socialistët e ndershëm nuk e pranojnë këtë proces. Si mundet një kryetar bashkie të futet në zyrë me dhunë”, tha Çupi.
Ndërsa sa i përket marrëveshjes me artistët për mbrojtjen e Teatrit Kombëtar nga shembja, ajo tha se ajo godinë është me vlera të jashtëzakonshme dhe duhet të rikonstruktohet.
“Kemi bërë marrëveshje me artistët që mbrojnë godinën, është diçka krejt normale. Ne kemi qenë në mbështetje të kauzës së artistëve. Është me vlera të jashtëzakonshme dhe duhet të mbetet aty. Godina rikonstruktohet. Ne sot kemi një Tiranë vetëm me kulla e beton. Ne do jemi në krah të artistëve gjatë gjithë verës për ta mbrojtur teatrin”, u shpreh ish-deputetja
Çupi foli edhe për kauzat e tjera të aksionit opozitar teksa shprehet se:
“Deri më 31 gusht, ka vendim të PD, ku janë kryetarët e degëve, të deleguarit dhe vetë Lulzim Basha, që po bëjnë një organizim dhe strukturim të brendshëm të partisë. Në të ardhmen do ta detajojmë. Kemi kontakte të vazhdueshme me target grupe që janë në vështirësi për jetesën, me të gjithë ata që kanë nevojë për ndihmë. Ne do merremi në detaje me çdo shqetësim të qytetarëve. Do bëjmë gjithçka për progresin në vendin tonë”.
