Kryeministri Edi Rama u zhvendos këtë pasdite në Kolonjë, për të prezantuar kandidatin për zgjedhjet vendore.
Gjatë fjalës së tij, Rama deklaroi para elektoratit se socialistët arritën të fitonin përballë qeverisë Berisha, për të cilën tha se kishte disa emra të rëndësishëm në qeverisje krahasuar me PD-në që udhëhiqet nga Lulzim Basha.
Po ashtu, nënvizoi se Berisha u rrëzua nga pushteti më 2013, në një kohë që, sipas Ramës po të dilje të protestoje kishte mundësi të të vinte plumbi kokës.
“Ne mundëm Berishën, kur kishte Boden, Jozefinën, kishte ca emra vërtetë që kishin autoritetet, ndërsa ne nuk mundkemi Lulin. Ka njeri që mund ta mendojë se partia e Lulit është më e fortë se ajo e Saliut, që Saliu kishte pushtet që po të dilje në protestë kishte gjasa të fuste plumbin. Na duheshkan tani votat që të mundim Lulin? Kjo është absurde.
Saliu është një i mbaruar. Mbarimi i tij është në zhvillim e sipër. Saliu edhe të tjerët vetëm po shkatërrojnë Shqipërinë dhe imazhin e vendit. Është mësuar Saliu që socialistët thotë janë njerëz të butë, do lëshojnë. Por boll më, nuk do i hapim rrugë budallait”, tha kryeministri.
