Të birit i bënë atentat/ Babai i Bledar Okshtunit: U traumatizuam

Babai i Bledar Okshtunit, 27-vjeçarit që u plagos me armë zjarri në zyrën elektorale të PD-së në Kavajë, ka folur për herë të parë për ngjarjen e ndodhur mbrëmjen e sotme.

Vullnet Okshtuni, tregoi në një prononcim për mediat, se ngjarja kishte ndodhur brenda shtabit elektoral, atje ku mblidheshin në çdo kohë.

Ndër të tjera, ai u shpreh se djali kishte marrë një plumb në këmbë dhe se ndodhej jashtë rrezikut për jetën.

“U traumatizuam sapo morëm vesh lajmin që djali ishte plagosur me armë. Jam demokrat që prej fillimit edhe djali ka lindur demokrat. Jemi të angazhuar si fis pranë PD-së. Unë mësova se ngjarja ka ndodhur brenda në shtabin elektoral, ku ne qëndrojmë për çdo ditë. Do ta mbrojmë deri në fund votën e demokratëve të Kavajës dhe nuk tërhiqemi para asnjë presioni. Djali është mirë, ka vetëm një plumb në këmbë. Ne si familje do vazhdojmë të jemi me PD. S’dua të komentoj në lidhje me agresorët, por ne nuk kemi konflikte personale me askënd. Nuk dimë se ça ka ndodhur mirë.”, tha babai i të plagosurit teksa qëndronte jashtë ambienteve të spitalit.