Ministri Bledi Çuçi deklaroi se shumë shpejt do të konstatohen të gjitha banesat që janë dëmtuar nga tërmeti i 26 nëntorit. Ndërsa shtoi se që prej ditës së sotme filloi procesi i shembjes së ndërtesave, proces të cilin e quajti të ndërlikuar, pasi ka pallate që duhen shembur me shume kujdes.
Në një lidhje direket në “Top Channel”, Çuçi iu bëri thirrje banorëve që të kenë durim.
“Mbyllëm fazën e parë të vështirë të rikuperimit, nxjerrjen nga rrënoja, nga banesat e shkatërruara, tani nis faza tjetër më e vështirë për kohëzgjatjen dhe ekspertizën që kërkon. Tashmë grupet e verifikimit po rriten përditë, përditë kemi inxhinierë që na vijnë nga vende të ndryshme të botës, duke i miksuar me inxhinierë shqiptarë po formohen grupe që ndodhen në terren, thirrje për gjithë banorët të Durrësit dhe jo vetëm: të kenë pak durim se do shkojmë në çdo godinë, banesë për të verifikuar shkallën e dëmtimit.
E kuptoj padurimin e tyre, gjithkush do vlerësim kompetent, edhe grupet do shtohen, shumë shpejt do konstatojmë të gjithë banorët që u janë dëmtuar ndërtesat. Kemi filluar prishjen, vetëm sot vetëm në Durrës kemi nisur me gjashtë ndërtesa, prishja është pak proces kompleks, ka pallate që duhen prishur me shumë kujdes, kemi raste që ka nisur prishja sot është ndërprerë do fillojë prapë nesër. Pjesa e prishjes është vënë në rrugë të drejtë, të mbarë dhe shumë shpejt këtë fazë, këtë etapë do ta kalojmë me sukses”, deklaroi ministri.
