Lideri i Partisë Demokratike të Kosovës, Kadri Veseli, ka qëndruar në të njëjtën linjë me Ramush Haradinaj, ndërsa thotë se heqja e takës nuk përbën asnjë risi nga Albin Kurti. Ai shkruan në një status në facebook se Kurti po lufton për të mbajtur pushtetin.
Teksa reflektohet mes rrjeshtave se është i zhgënjyer me të, ai shprehet se po dëshmon se është i dobët edhe mashtrues, dhe që Kosova në krye me të mund të rrezikohet seriozisht.
Statusi
Asgjë e re nga Albini! Të paktën, ta respektonte të drejtën e autorit. Sepse, vendimi i tij për taksën dhe reciprocitetin qenka huazuar nga ideja e propozimit tim të janarit të vitit 2019, të cilin, si çdo gjë tjetër, ai e pat refuzuar.
Si opozitar, ishte në gjendje ta digjte Kosovën dhe të përdorte dhunë dhe jetë të rinjsh idealistë për të ardhur në pushtet. Sot, kur udhëheq Qeverinë, ideali i tij po shihet se është vetëm mbajtja e pushtetit. Duke u shantazhuar, po e djeg veten më shpejtë sesa që kanë pritur të tjerët.
E mendonte veten si më të mençurin dhe më të fortin; sikur të ishte vetë Kosova. Po del që është edhe i padijshëm, edhe i dobët, edhe mashtrues, dhe që Kosova në krye me të mund të rrezikohet seriozisht.
Shtetet e Bashkuara të Amerikës kanë luajtur një rol të rëndësishëm në heqjen e taksës ndaj Serbisë. Sekretari amerikan i Shtetit, Mike Pompeo deklaronte se kërkesa për heqjen e taksës 100% ndaj mallrave serbe, nuk duhet të vonohej. Nga ana tjetër, i dërguari special i Presidentit Trump, Richard Grenell ka paralajmëruar më herët se “nëse tarifa nuk hiqet deri në fund të kësaj jave, atëherë gjërat mund të përshkallëzohen”.
