Henri Çili iu është përgjigjur pretendimeve të Prokurorisë se ai është takuar me një zyrtar të lartë të drejtësisë.
I ftuar në emisionin “Open”, Çili mohoi të ketë takuar një gjyqtar të lartë për të ndihmuar në çështjet gjyqësore.
Çili deklaron se nuk ka asnjë provë për një gjë të tillë, teksa shton se ai nuk ka takuar asnjëherë në jetën e tij një gjykatës. Më tej, ai tha se pret dosjen nga Prokuroria për ta kuptuar edhe ai vetë se për çfarë bëhet fjalë.
“Me një drejtues të lartë të drejtësisë? Në 14 shkurt dhe asnjë datë tjetër nuk kam zhvilluar asnjë takim në lidhje me këto dy çështje. Dhe në jetën time nuk kam takuar asnjë gjyqtar në lidhje me çështje gjyqësore. Nuk ka asnjë provë që të kem bërë një takim të tillë. Le ta paraqesin këtë provë.
Le të japin emrin. Nuk e di pse organi i akuzës nuk e publikon këtë emër. Nuk kam takuar asnjë gjykatës dhe asnjë zyrtar të sistemit të drejtësisë. Në jetën time nuk kam takuar asnjë gjykatës. Unë takoj shumë njerëz, për kafe, miqësi, etj. Është nonsens të përshkruajmë të gjitha takimet tona në 24 orë të ditës.
Nuk ka asnjë marrëveshje të fshehtë për të mos e publikuar emrin. Nëse do qëndrojë kjo akuzë e ndikimit të zyrtarëve të lartë çështja duhet t’i kalojë SPAK. Presim të na vijë dosja nga Përmeti që të shohim se për çfarë bëhet fjalë”, tha ai.
