Presidenti i Serbisë, Aleksandër Vuçiç u shpreh tepër i shqetësuar pas mbarimit të takimit midis tij dhe kryeministrit të Kosovës Albin Kurti, të mbajtur ditën e sotme në Bruksel, me ndërmjetësimin e Bashkimit Europian.
Në fjalën e tij para gazetarëve, Vuçiç tha se takimi me Kurtin shkoi shumë keq, teksa shtoi se Serbia u pajtua me disa propozime nga ndërmjetësit e BE-së, Josep Borrell dhe Miroslav Lajçak.
Sipas Vuçiçit, Kurti ishte përqëndruar të fliste më tepër për të kaluarën, dhe sipas tij, kryeministri kosovar është kthyer në shekullin e 19-të.
“Mendova se ishte e pamundur të kisha një takim më të keq dhe sot u binda se ishte e mundur. Ne morëm propozime nga BE-ja që ishin harmonizuar me negociatorët tanë kryesorë. Serbia gjithashtu ra dakord plotësisht me atë që e propozoi BE-ja. “Njerëzit në BE nuk besojnë në ato që po dëgjojnë. Burri është kthyer në shekullin e 19-të. Siç mund ta shihni, unë jam i shqetësuar, nuk e di se çfarë do të bëjmë”,Prezantimi i tyre ishte se Serbia është fajtore për tri gjenocidet në Kosovë. Pastaj ai na shpjegoi se emrat shqiptarë tërheqin emra nga toponimet në Serbi , ju mund të besoni se njeriu pas 150 vjetësh flet për këto”, theksoi Vuçiç.
Ky është takimi i dytë mes Kurtit dhe Vuçiçit. Takimi i parë mes tyre u zhvillua më 15 qershor, kur procesi i dialogut, i cili u ndërpre në shtator të vitit 2020, zyrtarisht rifilloi. Takimi i parë tregoi se palët kishin dallime të mëdha, megjithatë të dy zyrtarët u pajtuan që të vazhdojnë takimet.
Siç njoftoi zëdhënësi i Bashkimit Evropian (BE), Peter Stano, bisedimet midis Kurtit dhe Vuçiçit do të përqendrohen në përparimin e arritur si dhe për hapat e mëtejmë në procesin e dialogut.
