Presidenti i Serbisë Aleksandër Vuçiç, ka folur për takimin e djeshëm që pati në Bruksel, me kryeministrin e Kosovës Albin Kurti.
Në një konferencë për mediat në Beograd, Vuçiç e cilësoi fillimin e raundit të ri të bisedimeve, si fazën më të çuditshme të këtij procesi.
Sipas tij, Kurti dëshironte që pala serbe të largohej nga dialogum, teksa shtoi se mund ta ketë ofenduar Kurtin në takim, por u shpreh se nuk ndihet i penduar.
Aleksandër Vuçiç: ”Mund të konfirmoj që ata që erdhën në emër të palës së Prishtinës donin të na detyronin të largoheshim nga dialogu. Gjithçka që ata bënë, kërkuan dhe thanë do të thoshte që ata donin ta shmangnin dialogun. Ndoshta nuk duhet të kisha reaguar në atë mënyrë, mbase e fyeva Kurtin, por unë u përgjigja në një mënyrë më brutale dhe nuk mund të them se u pendova, isha i befasuar që dikush mund të përdorte një fjalor të tillë”.
Vuçiç dhe Kurti, u takuan ditën e djeshme në Bruksel, në kuadër të dialogut për normalizimin e marrëdhënieve.
Në takimin e parë të tyre, u shprehën vetëm qëndrimet dhe pritjet e palëve, ndërsa u arrit pajtim vetëm për mbajtjen e takimit të radhës në muajin korrik.
Kurti tha se Serbia refuzoi njohjen e Kosovës, por edhe propozimin për deklaratën e paqes, ndërs Kurti u shpreh se arritja e marrëveshjes me Serbinë do të jetë e vështirë, por shtoi se nuk është pesimist se një gjë e tillë nuk mund të realizohet.
