Marrëveshja mes Real Madridit dhe Juventusit duket se është drejt fundit dhe destinacioni i ri i Cristiano Ronaldos do të jetë Torino. Është agjenti i yllit portugez, Jorge Mendes ai që po punon shumë për të bërë të mundur këtë transferim dhe prej dy ditësh tashmë ai ndodhet në Madrid.
Një lëvizje e papritur e presidentit të bardhezinjve ka ngjallur dyshime se transferimi është kryer me sukses. Mediat italianë kanë publikuar një foto të Andrea Agnellit që është duke u nisur me një avion privat drejt Greqisë. Kujtojmë që në shtetin helen është duke kaluar pushimet edhe Cristiano Ronaldo.
Besohet se do të ketë një takim mes tyre ku do të diskutohen detajet e fundit të kontratës dhe shume shpejt mund të vijë edhe zyrtarizimi. Ditën e sotme në Madrid do të ketë edhe një mbledhje të bordit të Realit nga e cila mund të merret edhe vendimi përfundimtarë për yllin portugez.
Ky transferim besohet se do ti kushtojë Juventusit mbi 100 milionë euro, por mbetet akoma për tu diskutuar pasi presidenti madrilen, Florentino Perez kërkon të fitojë sa më shumë dhe nuk është pajtuar me shifrën e propozuar nga italianët. Ndërsa Ronaldo pritet të firmosë një kontratë 4-vjeçare nga e cila do të fitojë 30 milionë euro në sezon plus bonuset, e cila besohet të shkojë në 40 milionë. Por edhe agjenti Mendes që është duke bërë një punë mjaft të rëndësishme nuk do të dalë pa gjë, nëse gjërat shkojnë si duhet në arkat e tij do të kalojnë plot 25 milionë euro të paguara nga Juventusi.
