Vitet e fundit, çdo grupmoshë viziton destinacionin më “in” të momentit në Shqipëri të quajtur “Shalë”. Por ndryshe nga ç’jemi mësuar me këtë emër, historia dëshmon të dhëna të tjera. Në “Pushime on top”, një prej banorëve të zonës ka treguar se kishte pasur edhe hatërmbetje lidhur me emrin që i kishin vendosur zonës, duke treguar edhe emërtimin e saj të vërtetë.
Sipas tij, “Shala” quhet në të vërtetë “Blini i Gurit të Lekës”, pasi në zonë besohej që ka jetuar Lekë Dukagjini. Grykëderdhja e lumit të Shalës në liqenin e Komanit, është kthyer në vitet e fundit në një nga destinacionet më tërheqëse lumore të alpeve shqiptare. Izoluar nga majat e larta, rrjedha e vrullshme e ujit të kaltër të “Shalës”, i ofron aventurierëve një panoramë nga ato që ngjajnë me Tajlandën e largët. Banori i zonës tha se ai vend është i rrethuar me pemën e blinit, dhe prandaj ka marrë edhe emrin “Blini i Gurit të Lekës”.
“Ai vend nuk ka nevojë të quhet fare Tajlandë. Ai vend është i rrethuar me pemën e blinit dhe prandaj ka marrë edhe emrin “Blini i Gurit të Lekës”. Guri i Lekës është një fshat rreth një orë larg, dhe mendohet se ka jetuar Lekë Dukagjini, princi ynë. Por agjensitë turistike kanë të mira dhe të meta. Edhe për lumin e Shalës, që i vendosën atë emër ndoshta shumëkujt i ka mbetur qejfi. Ka pasur ditë që kanë shkuar edhe 1500 turistë në ditë. Duhet t’i dërgojmë turistët me prenotim”, u shpreh banori i zonës.
Lugina e Shalës, një zonë e virgjër lumore e cila vitet e fundit është futur në guidat e agjensive turistike, po tërheq një vëmendje të jashtëzakonshme, për shkak të natyrës së paprekur dhe mundësive të shumta që ofron. Aventurierët mund të shijojnë eksplorimin e zonës me varkë, ngjitjen në majat përreth me pamje spektakolare, si dhe zhytjen në ujin e freskët të lumit të Shalës.
