Ish-ministri i Brendshëm Saimir Tahiri në një prononcim për mediat pas daljes nga ambientet e kryesisë së Kuvendit pas mbledhjes së Këshillit të Mandateve theksoi se le të zbardhet Gërdeci dhe 21 janari dhe ai është i gatshëm të përballet me drejtësinë. Ai i kërkoi Berishës, djalit të tij, Ilir Metës, dhe Lulzim Bashës që të përballen me të në gjykatë për të gjitha aferat e tyre ku janë përfshirë nisur që nga ngjarja e 15 marsit 2008, vjedhjen në rrugën e Kombit, dhe 21 janarit të vitit 2011.
Ai shprehu gatishmërinë e tij për t’u hetuar në çdo moment nga Prokuroria por nuk e meriton një gjykim politik, pasi një të tillë e ka hasur vazhdimisht në këto vite të karrierës së tij politike.
Tahiri: Ju të gjithë e patë ç’lloj estrade. Ishte akti i dytë i një estrade. Unë jam i vendosur që të mos dorëzohem dhe t’i shkoj deri në fund të së vërtetës dhe pa asnjë diskutim. Në këtë rrugë do të ketë vështirësi të pafund, por unë nuk do të dorëzohem kurrë. Ajo që ndodhi sot ishte në kufijtë e skandalozes. Kjo që ndodhi sot dhe dje, as komunistët dhe fashistët nuk e kanë bërë. Të të thonë shko në burg se i gjejmë provat më vonë. Sjellin dëshmitar Saliun. Ai nuk ka shkuar as në gjykatë për të gjithë të zezat që i ka bërë këtij vendi. Të vijë djali i tij, nëse nuk vjen ai. Të vijë Ilir Meta. Nëse nuk vjen Ilir Meta, të vijë Monika. Nëse këta nuk kanë pasur kurajë më parë, le të vinë të përballen me mua për drejtësinë që duhet dhe që meritojnë njerëzit. Të gjithë duhet të shkojnë tek të vërteta. Unë do të jem i pari që rrëfej të vërtetën. Nuk hezitoj as të përgjohem dhe as të hetohem. Edhe në banesën time të vinë dhe të kontrollojnë.
Por unë as e pranoj dot kërkesën që “futu në burg dhe na provo më pas pafajësinë.” Unë pranoj çdo lloj hetimi por nuk pranoj kurrë një gjyq politik. Ata që e dinë shumë mirë, besoj që procesi do të kalojë në të gjitha fazat. Megjithatë, unë nuk kam ardhur këtu të merrem as se si Lulzim Basha ia ka hedhur drejtësisë, as se si i biri i Saliut, as se si Ilir Meta dhe Monika ia kanë hedhur drejtësisë. Unë nuk merrem me banditët që janë në Parlament dhe dalin sot dhe bëjnë moral. Nuk kam asnjë lloj qëllimi t’i fshihem ndonjë gjëje. Ju kërkoj vetëm durim dhe hajde të gjithë bashkë të presim derisa të dalë e vërteta. Unë i sfidoj të vijnë dhe të përballen me mua. Nëse është për thashethemet e dy kriminelëve më mirë merrem me thashethemet e Saliut, Lulit, Fatmirit etj.
