Kryeministri Edi Rama ka thyer heshtjen, duke komentuar kështu për herë të parë dënimin e dhënë nga Gjykata e Krimeve të Rënda për ish-ministrin e Brendshëm, Saimir Tahiri. Ky i fundit cilësohej kohë më parë si “ministri kampion”.
Gjatë një interviste dhënë për ‘Top Channel’, Rama u shpreh se sot Saimir Tahiri është një çështje e drejtësisë, ndërsa shtoi se çdo përgjegjesi në raport me ligjin e kujtdo është personal.
“S’kam asnje koment per te bere se eshte ceshtje e drejtesise. E kam thene qe nga dita e pare dhe deri diten e fundit, kam qene dhe do mbetem i idese se cdo pergjegjesi ne raportin me ligjin eshte personale, nderkohe pergjegjesia e forces politike apo e vet qeverise eshte menyra se si reagon ndaj cilit do qe ka nje problem me ligjin. Ne kete aspekt besoj se ne jemi nej shembull i pakonkurueshem ne keto 30 vjet”, deklaroi Rama.
Ish-ministri Saimir Tahiri, është shpallur fajtor për “shpërdorim detyre”, por i pafajshëm për “trafik droge”. Ky ka qenë vendimi i Gjykatës së Shkallës së Parë të Krimeve të Rënda, e cila e ka dënuar me 5 vite burg, por për shkak të gjykimit të shkurtuar konvertohet në 3.5 vite shërbim prove.
Gjykata ka ndryshuar veprën penale, duke rrëzuar tri akuzat e prokurorisë, dhe duke e dënuar atë vetëm për “shpërdorim detyre”.
