Deputetja demokrate Jorida Tabaku ka ironizuar me shifrën 17.9% të rritjes ekonomike, të artikuluar disa ditë më parë nga qeveria. Duke bërë një paralelizëm, Tabaku tha se ndërkohë që ne arrijmë këto shifra, rritja ekonomike në Amerikë është 6%.
Duke u ndalur në shifra konkrete, Tabaku deklaroi se gjatë pandemisë, 100 mijë shqiptarë dolën nga puna. Ajo shprehet se realiteti është shumë më larg të vërtetës, teksa shton se sot shqiptarët janë më të varfër.
“Askush nuk tha se 100 mijë shqiptarë dolën nga puna në vitin e pandemisë. Më 9 mars kur u mbyll Shqipëria, qeveria u zhduk, i lanë shqiptarët në mëshirë të plotë dhe rrinë këtu e thonë krenarë e i dhanë 3 paga.
Fondin Grancisë, 50% ja dhanë oligarkëve. Sot i gjithë buxheti ka lënë qytetarët në mëshirë dhe nuk është në shërbim të ekonomisë, por 11 personave që kanë grabitur parlamentin dhe ekonominë. Është rritur ekonomia me 17.9%, Amerika me 6%, imagjinoni pak. Po ça është rritur?
E gjitha është e ditës së zgjedhjeve. 120 milion eurot e rindërtimit kanë rritur ekonominë. E gjithë rritja artificiale që është vetëm pagesat që rriten me ditën e zgjedhjeve. Shqipëria reale është ajo që po përjeton inflacionin. Bujqësia që është sektori që duhet të kishte rritjen më të madhe, ka rënie të prodhimit dhe punësimit. E kanë zhdukur tregu e konkurrencën”, tha Tabaku.
