Pak ditë më parë “Fundjavë Ndryshe” publikoi rastin e familjes Alushaj në Fier, ku tre fëmijët jetim më zërin e mekur kërkonin ndihmë. Pas humbjes së jetës të kryefamiljarit nga një sëmundje e rëndë, vuajtjet nuk kishin të sosur për ta dhe për Rufien. Kushtet në të cilat jetonin ishin shumë të rënda, duke i shuar çdo shpresë për një të nesërme të bukur.
“Shumë e vështirë është jetesa, borxhe të mëdha kam për të shlyer. E vetmja e ardhur e imja është përkrahja sociale, 57 mijë lekë të vjetra. Më thanë që fëmijët nuk e përfitojnë statusin e jetimit, pasi burri nuk ka pasur sigurime në shtet. Këta janë tre, ku ja dalim dot ne me aq lekë,” bënte thirrje për ndihmë 39-vjeçarja, e cila nuk kishte asnjë përkrahje.
Ndërsa rritja për tre fëmijët ishte kthyer në sfidë, duke mos përjetuar asnjë ditë të lumtur.
Por, këto ditë të vështira tashmë mbetën pas. Në një kohë shumë të shkurtër “Fundjavë Ndryshe” arriti t’i sigurojë banesën. Arbër Hajdari, drejtuesi i “Fundjavë Ndryshe” falenderon gjithë bamirësit dhe bën me dije se ndihma për Asqeriun, Fjorin, Alesion, po ashtu edhe për Rufien do të vazhdojë gjithmonë.
“Sapo publikuam apelin e bërë nga Rufia, kishte reagim nga shumë njerëz. Por, veçanërisht është një djalë që jeton jashtë, Shkumbin Qormemeti. Menjëherë ishte një nga njerëzit më të gatshëm për të dhënë kontribute. Me të cilat ne bëmë të mundur shtëpinë dhe gjithë mobilimin e saj.”/ TIRANA TODAY
