Kryeministri i Kosovës, Albin Kurti ka reaguar pas sulmit me vezë që iu bë zv.kryeministrit, Avdullah Hoti.
Përmes një postimi në Facebook, Kurti shprehet se veprimet e tilla nuk e shqetësojnë qeverinë dhe se do të vazhdojë të punojë për të mirën e qytetarëve. Kreu i qeverisë së Kosovës i ka bërë thirrje opozitës të jetë më bashkëpunuese për të mirën e vendit.
“Veprimet e dirigjuara prej marazit të ngelur nga 6 tetori e 3 shkurti nuk e shqetësojnë qeverinë, e cila po punon e angazhohet për të mirën e popullit e të shtetit, dhe mbështetet gjerësisht nga qytetarët. zëvendëskryeministrit Hoti i uroj forcë e punë të mbarë, opozitës i dëshiroj frymë bashkëpunuese, edhe kur e luftojmë korrupsionin e krimin, edhe kur e mbrojmë shtetin e kombin”, shkruan ai në postimin e tij.
Sulmin ndaj Hotit e kanë dënuar edhe tre ministrat e LDK-së, Agim Veliu, Hykmete Bajrami dhe Lumir Abdixhiku si dhe nënkryetari i kësaj partie, Gazmend Muhaxheri.
