Gjatë fjalës në Kongresin e Partisë së Socialistëve dhe Demokratëve Evropianë, kryeministri Rama i është rikthyer çështjes sensitive, atë të sulmit kibernetik që erdhi nga Irani, duke nënvizuar se nuk ia arriti qëllimit. Kreu i qeverisë vuri në dukje se shkak i sulmit u bë strehimi i iranianëve nga vendi ynë. Ai shtoi më tej se bazuar në treguesin e zhvillimit digjital të Kombeve të Bashkuara, Shqipëria renditet e 8 në Evropë dhe e 19-ta në botë lidhur me zhvillimin e sistemeve teknologjike.
“Ne u përballëm me një sulm të rëndë nga Irani, në përpjekje për të fshirë të dhënat tona dhe për të shkatërruar sistemin tonë të shërbimeve online, që është një sistem shumë i zhvilluar në Shqipëri.
Vetëm dje në treguesin e zhvillimit digjital të Kombeve të Bashkuara, Shqipëria renditet e 8-ta në Evropë dhe e 19-ta në botë, që nënkupton që kemi një sistem të sofistikuar të shërbimeve online.
Ata na goditën në një pjesë strategjike të funksioneve tona të përditshme. Shqipëria është i vetmi vend në gjithë Evropën, që kishte më shumë hebrenj, sepse hebrejtë u mbrojtën dhe nuk ka asnjë dëshmi që iu dorëzuan nazistëve.
Kur Sllobodan Milosheviç nisi spastrimin etnik, rreth gjysmë milioni njerëz erdhën në Shqipëri. Kur filloi lufta në Afganistan, ne i hapëm dyert mijëra afganëve që askush nuk donte t’i merrte. Ishte një situatë e sikletshme, për tu parë që anëtarët e NATO-s patën idenë e tmerrshme të largoheshin pa ta. Ne nuk mund t’i shpëtonim të gjithë, por shpëtuam një pjesë të tyre”.
Portali shtetëror e-Albania ishte në shënjestrën e sulmeve kibernetike në mes të korrikut, dhe nuk funksionoi për disa ditë. Qeveria shqiptare njoftoi se bëhej fjalë për një sulm kibernetik të sofistikuar dhe të sinkronizuar nga jashtë. Njoftimin se prapa sulmit kibernetik qëndronte qeveria iraniane e bëri kryeministri Rama, në fillim të shtatorit. Më pas, të dy vendet i shkëputën marrëdhëniet diplomatike.
Diplomatët iranianë u larguan nga Ambasada në Tiranë, më 8 shtator. Shqipëria dhe Irani kanë marrëdhënie të tensionuara që nga viti 2014, kur Shqipëria ka pranuar rreth 3.000 anëtarë të grupit opozitar të mërguar të Organizatës së Popullit Muxhahedin të Iranit, i njohur edhe me emrin persian Muxhahedin-e-Khalk (MEK). Ata janë vendosur në një kamp në afërsi të Durrësit.
