Policia po heton në disa pista, lidhur me vrasjen që tronditi Kosovën mbrëmjen e djeshme, ku mbetën të vrarë dy nxënës dhe shoferi i një autobusi.
Tre persona kanë humbur jetën nga të shtënat me armë zjarri në një autobus në Gllogjan të Deçanit, i cili po transportonte nxënës.
Në këtë sulm mbetën të vrarë dy nxënësit; Ledion Hamzaj, 16 vjeç dhe Gentiana Mustafaj, 17 vjeç, si edhe shoferi i autobusit Gani Gjokaj. Një person tjetër mbeti i plagosur, por ndodhet jashtë rrezikut për jetën.
Ngjarja e rëndë u konfirmua nga zëdhënësi i Prokurorisë Themelore në Pejë, Shkodran Nikçi.
“Tre persona kanë humbur jetën si pasojë e gjuajtjes me armë zjarri”, ka konfirmuar Nikçi.
“Një është i plagosur. Aq sa kemi informacion, i plagosuri është jashtë rrezikut për jetën”, tha Nikçi.
Po ashtu, drejtori i Spitalit të Pejës, Skënder Dreshaj, ka thënë se personat që kanë ndërruar jetë janë dy nxënës.
Kurti: Policia është mobilizuar për ta hetuar këtë krim të rëndë
Kryeministri i Kosovës, Albin Kurti ka shprehur ngushëllime familjarëve të viktimave të sulmit në Gllogjan të Deçanit. Me anë të një postimi në Facebook, ka thënë se policia është mobilizuar për të hetuar këtë krim, dhe për të mundësuar drejtësi.
“Sonte u tronditëm nga lajmi për sulmin me armë zjarri ndaj autobusit me nxënës në Gllogjan të Deçanit. Sipas Policisë së Kosovës nga ky sulm kanë mbetur të vrarë tre qytetarë të vendit tonë, prej të cilëve dy nxënës.
Në emrin tim dhe në emër të Qeverisë së Republikës së Kosovës, u shpreh ngushëllimet më të sinqerta familjeve, shokëve e shoqeve, që humbën më të dashurit në këtë sulm. Të plagosurit i dëshirojmë shërim të shpejtë.
Policia është mobilizuar me kapacitetet e saj të plota për ta hetuar këtë krim të rëndë, e për të mundësuar drejtësi”.
Zëvendësdrejtori i Policisë Rajonale të Pejës, Veton Elshani, ka deklaruar se dyshimet e para bazuar në hetime, tregojnë se personi që ka sulmuar mund të ketë qenë i vetëm. Numri dy i Policisë Rajonale të Pejës, përjashtoi mundësinë e ndonjë akti terrorist.
“Nuk mendohet e as bëhet fjalë për ndonjë akt terrorist. Nuk ka aso lajme që mund të qarkullojnë. Bëhet fjalë për ngjarjen tronditëse, vrasje të trefishtë dhe një të plagosur në gjendje stabile në spital.
Kemi angazhuar të gjitha njësitet elite, njësiti me qen, specialët dhe shumë shpejt bashkohet edhe Prishtina, që nga Drejtori i Përgjithshëm. Kaq mund të them”, tha Elshani.
I mbijetuari i masakrës jep detaje për autorin e krimit
Një prej të mbijetuarve të sulmit me armë në Kosovë, ka zbuluar detaje rreth krimit makabër.
Sipas dëshmitarit, ka qenë një person i maskuar që i doli para autobusit me nxënës dhe hapi zjarr me kallashnikov.
“Ishim duke ikur me autobus. Na ka dalë para një person i maskuar me kallash në dorë edhe ka filluar të gjuajë drejt nesh. Gjithçka ka ndodhur shumë shpejt”, rrëfeu i mbijetuari, i cili kishte qenë i ulur në ndenjëset e para të autobusit.
