Kryeministri socialdemokrat i Suedisë, Stefan Leven, pritet të japë dorëheqjen brenda disa ditëve. Një zëdhënëse e z. Leven tha për agjencinë gjermane të lajmeve “Deutsche Welle”, se kryeministri synonte të informonte kryetarin e Parlamentit, Andreas Norlen, në fillim të kësaj jave, por kur saktësisht ishte ende i hapur.
Lëvizja ishte e pritshme. Z. Leven kishte njoftuar në gusht se synonte të jepte dorëheqjen fillimisht si kryetar partie, dhe më pas si kryetar i qeverisë.
Me këtë iniciativë ai dëshiron t’i japë mundësinë pasuesit të tij, që të përgatitet më lehtë në funksion të zgjedhjeve të ardhshme parlamentare, të cilat do të mbahen në vendin skandinav në fund të verës së vitit 2022.
Ministrja e Financave, Eva Magdalena Anderson, u zgjodh kryetarja e re e partisë të enjten. Kreu i ri i socialdemokratëve do të pasojë gjithashtu Stefan Leven si kryeministër.
Social Demokratët kanë qeverisur Suedinë për vite me radhë, në bashkëpunim me të Gjelbërit, me të cilët ka formuar një qeveri koalicioni të pakicës. Z. Leven është kryeministër që nga tetori i vitit 2015. Anderson do të jetë gruaja e parë që do të marrë postin e kryeministrit, megjithëse Suedia nuk është ende një nga vendet më të përparuara për sa i përket barazisë gjinore.
Burimi i lajmit: athina984.gr. Përshtatur nga Tirana Today
