Në Itali, situata ka dalë jashtë kontrollit. Jo vetëm humbje jete, por edhe krizë ekonomike. Autoritetet kanë vendosur masa të tjera shtesë, pasi shifrat e të infektuarve janë në rritje, duke mos iu përgjigjur dot me shëndetësinë.
Vendosja e një fashe orari për të bllokuar lëvizjen, ka revoltuar qytetarët, të cilët janë të lodhur nga kjo situatë. Por nga ana tjetër, kërkuesit italianë i janë drejtuar me një thirrje të fortë kryeministrit të vendit, Giuseppe Conte, që të reagojë me urgjencë, pasi mund të kenë me qindra të vdekur në ditë.
“Duhen masa drastike dhe urgjente brenda dy ose tri ditëve, për të shmangur mundësinë që shifrat të arrijnë brenda tri javëve në disa qindra të vdekur në ditë”, shkruajnë në letër studiuesit. Disa prej tyre rektorë të disa prej universiteteve më prestigjioze italiane.
Pak ditë më parë, Conte tha se nuk e shikojnë si një mundësi mbylljen totale. Por sipas intelektualëve “masat efikase të menjëhershme, do ta ndihmonin ekonominë dhe vendet e punës. Sa më shumë të presim, aq më shumë masat do të jenë të rrepta dhe do zgjasin më shumë, duke patur impakt më të madh”.
