Studimi: Të dhënat mbështesin lidhjen e Covid-19 me humbjen e dëgjimit

Humbja e dëgjimit dhe problemet e tjera të dëgjimit janë shumë të lidhura me sëmundjen e Covid-19. Në këtë përfundim mbërrin një rishikim sistematik i të dhënave nga një studim i udhëhequr nga shkencëtarët e Universitetit të Mançesterit dhe Manchester Biomedical Research Center (BRC).

Profesor Kevin Munro dhe studiuesi Ibrahim Almufarrixh, analizuan 56 studime që identifikuan një lidhje midis sëmundjes sëCovid-19 dhe problemeve dëgjimore dhe vestibulare. Ata bashkuan të dhënat e 24 studimeve për të vlerësuar, se ajo që ndeshej më shpesh tek kjo simptomë ishte ndjesia e tringëllimës në vesh në 7.6 për qind të rasteve, tinitus 14.8 për qind, dhe marramendja me 7.2 për qind të rasteve.

Të dhënat e tyre kryesisht përdorën pyetësorë të vetë-raportimit, ose të dhëna mjekësore për të marrë simptoma të lidhura me Covid-19, në vend të testeve të dëgjimit më të besueshme shkencërisht. Kevin Munro, profesor i audiologjisë në Universitetin e Mançesterit tha: “Ekziston një nevojë urgjente për një studim klinik dhe diagnostifikues i kryer me shumë kujdes, për të kuptuar efektet afatgjata të Covid -19 në sistemin e dëgjimit.

Dihej që më parë se viruse të tilla si fruthi, shytat dhe meningjiti mund të shkaktojnë humbje të dëgjimit. Por deri tani ka pak informacion mbi efektet dëgjimore që shkakton virusi SARS-CoV-2”.

Munro thekson se ndonëse ky rishikim ofron prova të mëtejshme për një lidhjes mes humbjes së dëgjimit dhe Covid-19, studimet që ata shqyrtuan ishin të cilësive të ndryshme, prandaj duhet më shumë punë në këtë drejtim.

Profesor Munro, po udhëheq aktualisht një studim 1-vjeçar në Mbretërinë e Bashkuar për të investiguar ndikimin e mundshëm afatgjatë të Covid-19 në dëgjimin midis njerëzve që janë trajtuar më parë në spital për koronavirusin e ri.

Lexo edhe :   Covid-19 në Gjermani: Merkel për një mbyllje afatshkurtër të vendit

Ekipi i tij shpreson të vlerësojë me saktësi numrin dhe ashpërsinë e çrregullimeve të dëgjimit të lidhura me Covid-19 në Britaninë e Madhe, dhe të zbulojë se cilat pjesë të sistemit të dëgjimit mund të preken gjatë sëmurjes me koronavirusin e ri.

Gjithashtu ata do të eksplorojnë lidhjen midis tyre dhe faktorëve të tjerë të tillë si stili i jetës, prania e një ose më shumë kushteve shëndetësore shtesë dhe ndërhyrjet që i janë nënshtruar në repartet e terapisë intensive. Një studim i fundit i udhëhequr nga profesor Munro, sugjeroi se më shumë se 13 për qind e pacientëve që dolën nga një spital të shtruar më herët për shkak të Covid-19, raportuan një ndryshim në dëgjimin e tyre.

Ibrahim Almufarixh thotë:“Edhe pse provat janë të cilësive të ndryshme, po kryhen gjithnjë e më shumë studime, ndaj sasia e provave po shtohet. Ajo që na duhet, janë studime që krahasojnë rastet e Covid-19 me kontrollet rutinë, si për shembull të pacientëve të shtruar në spital me kushte të tjera shëndetësore.

Sipas tij, ndonëse duhet të kihet kujdes shpresohet që ky studim të shtojë peshën e provave shkencore, se ka një lidhje të fortë midis Covid-19 dhe problemeve të dëgjimit. Profesor Munro shtoi:“Gjatë muajve të fundit unë kam marrë shumë e-maile nga njerëz që raportuan një ndryshim në dëgjimin e tyre, apo tringëllimë në veshë, pasi ishin prekur nga Covid-19. Ndërsa kjo është alarmante, kërkohet kujdes pasi është e paqartë nëse ndryshimet në dëgjim i atribuohen drejtpërdrejt Covid-19 apo faktorëve të tjerë, si trajtimet e ndryshme në repartet e urgjencës.

Burimi i lajmit: https://medicalxpress.com/news/2021-03-evidence-covid-loss-link-scientists.html

Përshtatur nga TIRANA TODAY